Sep 19 2026 | २०८३, असोज ३ गते
Follow us
२०८३, असोज ३ गते
Sep 19 2026 | २०८३, असोज ३ गते
काठमाडौं । उपभोक्ता संरक्षण परिषद्ले आगामी चाडपर्वलाई लक्षित गरी बजार अनुगमनलाई तीव्रता दिने निर्णय गरेको छ।
परिषद्को पाँचौँ बैठकले बजार अनुगमनसम्बन्धी कार्य योजना केन्द्रीय बजार अनुगमन समितिबाट स्वीकृत गरी कार्यान्वयन गर्ने निर्णय गरेको हो। यससँगै प्रदेश, स्थानीय तह र संघीय इकाइहरूसँगको सहकार्य र प्रभावकारिता बढाउन उपभोक्ता संरक्षण ऐन, २०७५ को दफा २७ बमोजिम गठित प्रदेश बजार अनुगमन समितिहरूलाई प्रभावकारी ढंगले कार्य सञ्चालन गर्न लेखी पठाइने भएको छ।
बैठकले ऐनको दफा १३ बमोजिम बजारका तह निर्धारण गर्ने, दफा २१ बमोजिम वस्तु तथा सेवाको मूल्य मापदण्ड तय गर्ने र वाणिज्य तथा आपूर्तिसँग सम्बन्धित नीतिगत व्यवस्थामा आवश्यक सुधारका सम्बन्धमा प्रतिवेदन पेस गर्न वाणिज्य, आपूर्ति तथा उपभोक्ता संरक्षण विभागका महानिर्देशकको संयोजकत्वमा निजी क्षेत्र तथा सरोकारवाला निकायहरूको सहभागिता रहने गरी समिति गठन गर्ने निर्णयसमेत गरेको छ।
यस्तै, ऐनको दफा २८ बमोजिम गठित स्थानीय बजार अनुगमन समितिहरूलाई स्थानीय तहमा दर्ता भएका तथा क्षेत्राधिकारभित्र पर्ने वस्तु तथा सेवाको नियमनलाई प्रभावकारी बनाउन लेखी पठाइने छ।
